Hasirukranti
leadingnews ತಂತ್ರಜ್ಞಾನ ರಾಷ್ಟ್ರೀಯ

ಮಂಗಳ ಗ್ರಹದಲ್ಲ್ಲಿ ಉಪ್ಪುನೀರಿನ ಸರೋವರಗಳ ಪತ್ತೆ

 

ಕೇಪ್ ಕೆನವರಲ್: ಅಂತಾರಾಷ್ಟ್ರೀಯ ಖಗೋಳ ವಿಜ್ಞಾನಿಗಳ ತಂಡ ಮಂಗಳ ಗ್ರಹದಲ್ಲಿ ಉಪ್ಪು ನೀರಿನ ಸರೋವರಗಳಿರುವುದನ್ನು ಪತ್ತೆ ಮಾಡಿದೆ. ಆದರೆ ಈ ಸರೋವರಗಳು ಮಂಗಳನ ನೆಲದಡಿ ಹುದುಗಿವೆ ಎಂದು ತಿಳಿಸಿದ್ದಾರೆ.

ಮಂಗಳನಲ್ಲಿ ಸರೋವರಗಳಿರುವ ಕುರುಹುಗಳನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ. ಇದೀಗ ಮಂಗಳನ ನೆಲದಾಳದಲ್ಲಿ ಇನ್ನೂ ಮೂರು ಸರೋವರಗಳ ಉಪಸ್ಥಿತಿಯನ್ನು ಸಂಶೋಧಕರು ಪತ್ತೆ ಮಾಡಿದ್ದಾರೆ. ಈ ಕುರಿತು ‘ನೇಚರ್’ ಖಗೋಳ ವಿಜ್ಞಾನ ನಿಯತಕಾಲಿಕೆ ಸೋಮವಾರ ಪ್ರಕಟಿಸಿದೆ.

ರೋಮ್ ವಿಶ್ವವಿದ್ಯಾಲಯದ ಖಗೋಳ ವಿಜ್ಞಾನಿಗಳು ಎರಡು ವರ್ಷದ ಹಿಂದೆಯೇ ಮಂಗಳ ನೆಲದಡಿ ಬೃಹತ್ ಸರೋವರಗಳು ಹುದುಗಿರುವ ಕುರಿತು ಅಂದಾಜಿಸಿದ್ದರು. ಆದರೆ, ಹಲವು ದತ್ತಾಂಶಗಳಿಂದ ಖಚಿತಪಡಿಸಿಕೊಂಡ ನಂತರ ಈ ವಿಚಾರವನ್ನು ‘ನೇಚರ್’ ನಿಯತಕಾಲಿಕೆಯಲ್ಲಿ ಪ್ರಕಟಿಸಿದ್ದಾರೆ. ಈ ವಿಜ್ಞಾನಿಗಳು ‘ಯೂರೋಪಿಯನ್ ಸ್ಪೇಸ್ ಏಜೆನ್ಸಿಯ’ ರಾಡಾರ್ ಸೌಂಡರ್‍ನ ದತ್ತಾಂಶಗಳನ್ನು ಬಳಸಿ ಸಂಶೋಧನೆ ನಡೆಸಿದ್ದಾರೆ.

ಮಂಗಳನ ನೆಲದಡಿ ಸುಮಾರು 20ರಿಂದ 30 ಕಿಲೋಮಿಟರ್‍ನಷ್ಟು ವಿಸ್ತಾರವಾಗಿ ಈ ಸರೋವರಗಳು ಹರಡಿಕೊಂಡಿವೆ. ಒಂದು ಸರೋವರ ವಿಸ್ತಾರವಾಗಿದ್ದು, 30 ಕಿಮೀ ಅಗಲವಿದೆ. ಉಳಿದ ಎರಡು ಸರೋವರಗಳು ಕೂಡ ಹಲವು ಕಿಮೀ ಉದ್ದಕ್ಕೆ ಚಾಚಿವೆ ಎಂದು ಸಂಶೋಧಕರು ತಿಳಿಸಿದ್ದಾರೆ. ಮಂಗಳನಲ್ಲಿ ಸರೋವರಗಳ ಇರುವಿಕೆಯನ್ನು ಸಾಬೀತುಪಡಿಸುವ ಹಲವು ಸಾಕ್ಷ್ಯಾಧಾರಗಳನ್ನು ಸಂಶೋಧಕರು ಒದಗಿಸಿದ್ದಾರೆ.

ಒಂದು ವೇಳೆ ಮಂಗಳನಲ್ಲಿ ನೀರಿನ ಸೆಲೆ ಇರುವುದು ನಿಜವಾದರೆ, ಅದು ಜೀವಿಗಳ ಆವಿರ್ಭಾವಕ್ಕೆ ಕಾರಣವಾಗಲಿದೆ. ಮಂಗಳ ಗ್ರಹ ಜೀವಿಗಳ ಉಗಮಕ್ಕೆ ಸಿದ್ಧವಾಗುತ್ತಿದ್ದರೆ ಮುಂದೆ ಅಲ್ಲಿಯೋ ಜೀವಿಗಳ ಉಗಮವಾಗುವ ಸಾಧ್ಯತೆ ಇದೆ. ಸರೋವರಗಳಲ್ಲಿನ ಉಪ್ಪಿನ ಪ್ರಮಾಣವು ಇಲ್ಲಿ ನಿಜವಾದ ಸಮಸ್ಯೆಯಾಗಿದೆ. ಮಂಗಳ ಗ್ರಹದ ಯಾವುದೇ ಭೂಗತ ಸರೋವರಗಳು ನೀರು ದ್ರವವಾಗಿ ಉಳಿಯಲು ಸಮಂಜಸವಾಗಿ ಹೆಚ್ಚಿನ ಉಪ್ಪಿನಂಶವನ್ನು ಹೊಂದಿರಬೇಕು ಎಂದು ಹೇಳಲಾಗಿದೆ.

ಮಂಗಳನ ಒಳಭಾಗದಿಂದ ಅಲ್ಪ ಪ್ರಮಾಣದ ಶಾಖವಿರಬಹುದು. ಆದರೆ, ಮಂಜುಗಡ್ಡೆಯನ್ನು ಕರಗಿಸಲು ಇದು ಸಾಕಾಗದು. ಹೀಗಾಗಿ ಅಂತರ್ಗತ ಸರೋವರಗಳಲ್ಲಿ ನೀರು ದ್ರವರೂಪಕ್ಕೆ ಬರಲು ಉಪ್ಪಿನ ಅಂಶ ಹೆಚ್ಚಿರಬೇಕು ಎಂದು ಸಂಶೋಧಕರು ತಿಳಿಸಿದ್ದಾರೆ.

Related posts

ಪುಲ್ವಾಮದಲ್ಲಿ ಮತ್ತೆ ಗುಂಡಿನ ದಾಳಿ: ಓರ್ವ ಸೈನಿಕ ಹುತಾತ್ಮ; ಮೂವರು ಉಗ್ರರ ಹತ್ಯೆ

Siddu Naduvinmani

ಶಿಕ್ಷಣ ಕ್ಷೇತ್ರದಲ್ಲಿ ಬಹುದೊಡ್ಡ ಪರಿವರ್ತನೆಗೆ ಕಾರಣವಾದ ಕೊರೊನಾ

Hasiru Kranti

ರಾಜ್ಯದಲ್ಲಿಂದು 6 ಸಾವಿರಕ್ಕೂ ಹೆಚ್ಚು ಜನರಿಗೆ ಸೋಂಕು – 2 ಲಕ್ಷ ದಾಟಿದ ಕೊರೋನಾ ಪ್ರಕರಣಗಳ ಸಂಖ್ಯೆ

Siddu Naduvinmani

Leave a Comment